მულტისენსორული ყავის მაგიდა (პირველი ვარიანტი)

როგორც იქნა მოვკიდე ხელი ბლოგს..

ყავის მაგიდა, რომელიც წინა პოსტში ვახსენე (და ეს იყო თებერვალში, ეხლა მაისია) ავაწყე მარტში. მარტში ილიას სახელმწიფო უნივერსიტეტის საინჟინრო კოლეჯის გამოფენაზეც მქონდა გატანილი.

ესე იგი: ავაწყე ყუთი , ცოტა უცნაური კონსტრუქციის - ორმაგი გვერდები, გარე გვერდზე მაგიდის თავი დამაგრდება

ყუთის შუა ნაწილი დაიხურა და მის ძირზე განთავსდება კამერა და განათება

ზემოდან დამაგრდება მაგიდის თავი

დანარჩენს სურათებიც იტყვის:











საბოლოოდ გამოვიდა ასეთი რამ:






მაგრამ......

დახვეწა

ჩემი მაგიდის მუშაობის გასაუმჯობესებლად რამოდენიმე დამატებითი ცვლილება შევიტანე:
1. მაგიდის ზედა მხარეს დავსვი დინამიკები;
2. კამერა ცოტათი დაბლა დავწიე, უკეთესად რომ დაინახოს (უფრო ნაკლები კუთხით) თითების ანარეკლი კიდეებიდან;
3. დავამატე ვენტილაცია
4. დამატებითი ინფრაწითელი მანათობლები დავამზადე და დავამაგრე
5. დავამატე დამოუკიდებელი კვების ბლოკები - ცალკე ვენტილატორებისათვის და ცალკე მანათობლებისთვის
6. კომპიუტერი დავშალე და ნაწილ-ნაწილ ”ავაკარი” შიგნიდან
7. პულტი დავუკეთ გარედან, სადაც ერთდება დენის წყარო და აქვს ჩასართავი ღილაკი, ასევე ინდიკატორები
ეხლა გაცილებით უკეთესად მუშაობს!
აი ცოტა სურათებიც:

ჩემი მაგიდა რუსთავი 2-ზე

ჯანომ რომ ნახა მაგიდა, ძალიან მოეწონა და კარგა ხანი "დამდევდა" უნდა გავაკეთო სიუჟეტიო, ჰოდა აი, როგორც იქნა მეც მოვიცალე და მაგიდაც მეტ-ნაკლებად გამზადებულია სარეპორტაჟოდ "საბავშვო ამბებში"

საცდელი ჩართვა

საცდელი ჩართვა იყო "უმტკივნეულო". მართალია, ყველა ინფრაწითელი გამნათებლები არ იყო "ამოქმედებული" და ეკრანის კიდეებში შეხების ამოცნობა ჭირდა, მაგრამ ზოგადად შედეგი დამაკმაყოფილებელი იყო. ჩემს მიერ შექმნილმა ინფრაწითელმა გამნათებლებმა გაამართლა.

უხილავი მზე

როგორც იქნა მოვახერხე ჩემს "კარადა-მაცივარში" საცდელად ინგრედიენტების შელაგება და საცდელად ჩართვა. ეს იყო დაახლოებით 3 კვირის წინ. სამწუხაროდ საცდელი ჩართვის სურათები და ვიდეო არ მაქვს, შემდეგ ჩართვაზე გადავიღებ.
ცდისას გამოჩნდა, რომ საჭიროა კარგი, თანაბარი ინფრაწითელი განათების უზრუნველყოფა ეკრანის ქვემოდან, რასაც ვერ ახერხებდა იბეიზე ნაყიდი 48 დიოდიანი ინფრაწითელი გამნათებლები (4 ცალი შევუდგი). ამიტომ რამოდენიმე დღის წინ დავიწყე წაგრძელებული ფორმის გამნათებლების აწყობა:

29სმX3სმ ზომის ბეჭდური პლატები მოვჭერი, გავასუფთავე და გავამზადე სურათის დასატანად:


დავიტანე ზედ გამტარების ნახატი, ფრჩხილების ლაქით :)


გავამზადე შიშვლად დარჩენლი სპილენძის მოსაცილებელი ხსნარი (წყალბადის ზეჟანგი+მარილმჟავა+წყალი) და ჩავაგდე მოსაწამლად:


მოწამლული ასეთი გამოვიდა:


ფრჩხილების ლაქი სცილდება აცეტონით:


და ბოლოს მივარჩილე ჩემი პაწაწუნა ინფრაწითელი დიოდები:


და შევაერთე კვების წყაროს.

ანათებს მზესავით...ოღონდ უხილავი მზესავით:



ეს ნათება მხოლოდ ღამის მხედველობის (ინფრაწითელ შუქს რომ აღიქვამს) კამერით ჩანს, შეუიარაღებელი თვალით - არა.

მაგიდა მზადაა!

მაგიდაა, თუ ყუთი, თუ მაცივარი, მოკლედ, დღეს დაამთავრეს ჩემი შეკვეთილი მაგიდის აწყობა, ბოლო აკორდი იყო ჩემი ეკრანის (რომელიც დღეს მივიტანე) ჩასმა ჩარჩოში, რამაც ექსცესების გარეშე ჩაიარა.
ყუთი გამოვიდა საკმაოდ მოზრდილი, დაახლოებით 103სმX136სმ, სიმაღლე 100სმ, არცერთ კარებში არ ეტევა (ლავუაზიეს კანონია რა :D), რომ არა ჩემი ორიგინალური (!) გადაწყვეტა, რომ ყუთი ყოფილიყო ორ-ნაწილიანი, ზედა ნაწილი - ეკრანის ჩარჩო და მის ქვემოთ, სადღაც 30სმ და ქვედა ნაწილი - დანარჩენი ქვედა მხარე - სადღაც 70სმ. ეს ორი ნაწილი ერთმანეთს ადვილად სძვრება და უკან უკეთდება, ხოლო ნაწილ-ნაწილ უკვე ეტევა კარებებში ("მოდი ჯერ ერთი ნაწილი გამოვიტანოთ, მერე მეორე და მერე ისევ თავისივე წებოთი შევაერთოთ" © კ/ფ "ქვევრი").

ეხლა კი დავიწყებ ამ ყუთის შევსებას შიგთავსიით: პროექტორი - კედელზე; ინფრაწითელი "პროჟექტორები" - გასაკეთებელი მაქვს ჯერ; კამერა; კომპიუტერის შიგთავსი - ანუ ყუთის გარეშე; დინამიკები; მართვის პულტი - საერთო კვების კონექტორით და ჩამრთველით, კომპიუტერის ჩამრთველი ღილაკით, რამოდენიმე USB შესაერთებლით; ამ ყველაფრის სადენების გაყვანა-გამოყვანა-დამაგრება.

პროექტორს არანაირი ღილაკები არააქვს, სრულიად პულტით იმართება. მართალია პროექტორი დამალულია ეკრანის ქვეშ, მაგრამ ჩემი ჯადოსნული ეკრანი ატარებს პულტის ინფრაწითელ სხივებს და პროექტორიც "ხედავს" თავის "მბრძანებელს".

და ცოტა სურათები (დააწკაპე გასადიდებლად):

სახელოსნო, სადაც აწყობდნენ ჩემ მაგიდა-ყუთს (მაგრები არიან ბიჭები, თუ დაგჭირდათ ალუმინის ხელოსანი, რეკომენდაციას ვუწევ)


ხელოსანი კახა და ჩემი მაგიდის ქვედა ნაწილი


ეს თვით ზაზა - დიზაინერ-კონსტრუქტორ-კონსულტანტ-მენეჯერი :)


ეკრანის ნაწილი და ჩარჩოს კუთხე - მოახლოებული


ჩემს მანქანაში მთლიანად არ ჩაეტია, მომიწია ტაქსის დაქირავება


და ბოლოს, აწყობილი მაგიდა-ყუთი უკვე სახლში

მაგიდა იქნება 5 დღეში

დღეს ვიყავი ისევ ელიავას ბაზრობაზე. ისევ უაზროდ დავბორიალობდი და ვათვალიერებდი პროფილებს, კუთხეებს, კანტებს და ასე შემდეგ... შემხვდა ჩემი ძველი თანამშრომელი, რომელიც აღმოჩდა, რომ მუშაობს ფინანსისტად, ელიავაზე, ერთერთ მაRაზიაში. ავუხსენი, რო ასე, ტვინს ვიჭყლეტავ ამ მაგიდის დიზაინზე. მან მიმიყვანა ხელოსანთან, ზაზასთან, რომელსაც ავუხსენი რა მინდა იდეაში. ზაზა გამყვა მაღაზიაში, ავარჩიეთ საჭირო აქსესუარები და ნაწილები, მერე დავთვალეთ მასალები და მივეცი შეკვეთა. ასე მითხრა, ოთხშაბათს-ხუთშაბათისთვის დავამთავრებო. ძალიან მიხარია, რომ საქმემ კიდევ წინ წაიწია.

მაგიდის დიზაინი

მოკლედ ვიყავი იმ დღეს ელიავაზე. შევიდოდი რამე მაღაზიაში და ერთი საათი ვათვალიერებდი, გამყიდველები ცერად მიყურებდნენ და ალბათ ფიქრობდნენ ვინააო ესო, რა უნდაო, არაფერს არ ყიდულობსო (ელიავაზე ავეჯის აქსესუარების მაღაზიებში ვინც შედის, ყველამ იცის რას ყიდულობს, იმიტომ რომ ძირითადად ავეჯის ხელოსნები არიან ხოლმე). ვეძებდი ავეჯის იმ ნაწილებს, რომლითაც მოხერხებულად და მოხდენილად გამოვიდოდა მაგიდის კედლების (რომელიც ლამინატის იქნება) და ეკრანის მასალის შერწყმა. რაღაცეები დავიმახსოვრე (ძირითადად ალუმინის კუთხეები) როგორი პროფილების არსებობს, რომ მერე თავში მომეფიქრებინა რომლით უფრო კარგად გამოვიდოდა.
ჰო, ელიავაზე დიდი სარკეც მოვაჭრევინე, რომ გამესინჯა ჩემს პროექტორზე, თუ რამე გამოვიდოდა სარკით, მაგრამ ამაოდ: ფართოკუთხიან პროექტორზე, რომელსაც ეკრანზე დაცემის ძალიან დახრილი კუთხე აქვს, სარკით გამოსახულების "მოტეხვა" საკმაოდ რთულია (ტრაპეციას იღებ, რომელსაც ვერ გაასწორებ) და გადავწყვიტე სარკე საერთოდ არ გამოვიყენო და პროექტორი "პირდაპირი ხედვით" დავაყენო. ეს მაგიდას სიმაღლეს უმატებს და ეკრანის ერთ მხარეს ითხოვს დაახლ 20 სანტიმეტრის თავისუფალ ადგილს (გამოსახულება პროექტორიდან ამდენივეთი იწევს ზემოთ, კედელზე რო ანათებ), მაგრამ არაუშავს. გუშინ საღამოს "გუგლ-სკეჩაუფ"-ში მოვჯღაბნე დაახლოებითი დიზაინი. ამ თავისუფალი ადგილის სასარგებლოდ გამოყენებაც შეიძლება, მაგალითად დინამიკებს ჩავსვავ და რამე რო იყოს, კლავიატურაც დაიდება (ან ყავის ჭიქები და ნამცხვარი :)). კომმენტს - ველქამ!

პროექტორი და სარკე

გუშინ ჩამომივიდა პროექტორი და სარკე. პროექტორს აქვს უზარმაზარი ლინზა და საჭირო ზომის გამოსახულებას იძლევა დაახლოებით 60 სანტიმეტრიდან. სარკე, რომელიც მჭირდება, რომ ჰორიზონტალურად მიმართული პროექცია მივმართო ვერტიკალურად, ზემოთ, ძალიან პატარა აღმოჩნდა - ისე მალევე იშლება პროექცია, რომ წინ დადებული სარკის ზომებს სცდება. მომიწევს თავიდან შეკვეთა, დიდი ზომისა. ეხლა მივდივარ ელიავაზე, მაგიდის "ავეჯური" ნაწილისთვის შესაძლებლობების სანახავად.

ახალი მაგიდის ნაწილები

ცოტა ხნის წინ გადავწყვიტე თხევადკრისტალურის აწყობა გადავდო (გარკვეული ხნით) და ავაწყო დიდი ზომის DI (ან ლაზერებით) მაგიდა. შევუკვეთე შესაბამისი ნაწილები: ეკრანის მასალა (მაიკროსოფტი რო იყენებს, ერთერთ წინა პოსტში დავწერე ამის შესახებ), პროექტორი, რომელიც ძალიან პატარა მანძილიდან იძლევა დიდი ზომის გამოსახულებას და კამერა. კამერა უკვე ჩამომივიდა და გუშინ ჩამომივიდა ეკრანის მასალა, რომელსაც ძალიან ველოდებოდი. ეკრანის ზომა იქნება 120სმ X 75სმ.

ოპტიკური "თვალთვალის" პრეზენტაცია

5 მაისს ამერიკულ აკადემიაში შედგა გიორგის (მემგონი ბაჯაძე), მე-12 კლასის მოსწავლის პრეზენტაცია. მან ჯავაში დაწერა ოპტიკური თვალთვალის პროგრამა: ეკრანზე, სადაც პროექტორით გაშვებული იყო აპრლიკაციის ფანჯარა და ამას უყურებდა ვებკამერა. ლაზერით მინათებულ წითელ წერტილს კამერა "იჭერდა" და წერტილის მოძრაობისას ფანჯარაში ხატავდა მისი მოძრაობის კვალს. ანუ პროგრამა ამ ლაზერის წითელ წერტილს "დასდევდა". ჩემს მაგიდაზე უნდა გაეკეთებინა პრეზენტაცია თვალსაჩინოებისათვის, მაგრამ დრო არ იყო, რომ მაგიდა ამისათვის მოემზადებინა, მაგრამ პრეზენტაციის მეორე ნაწილში გიორგიმ გვაჩვენა ამ პროგრამის შედეგი, ანუ რა შეიძლება გამოვიდეს ამ პროგრამის დახვეწით და აჩვენა მულტისენსორული ეკრანის შესაძლებლობები არსებული პროგრამებით და ჩემი მაგიდით.
მე სურათებს ვიღებდი (დააწკაპე გასადიდებლად):