მულტისენსორული ტექნოლოგიების პრეზენტაცია Mountain View-ში, კალიფორნია

მაუნთინ ვიუ (Mountain View) არის ერთ-ერთი პატარა, მყუდრო, მწვანე ქალაქთაგანი სილიკონის ველზე, სადაც იბადება და ხორციელდება ინფორმაციული ტექნოლოგიების გენიალური წამოწყებები. ამ ქალაქში "ბინადრობენ" Google, LinkedIn, VeriSign, Mozilla, აქვე მეზობელ ქალაქში - "ფეისბუქი" და სხვა ცნობილი კომპანიები.

მაუნთინ ვიუში რამოდენიმე ენთუზიასტმა პროგრამისტმა ჩამოაყალიბა კლუბი ინფორმაციული ტექნოლოგიების პროფესიონალთათვის, სადაც ნებისმიერ მსურველს შეუძლია ნებისმიერ დროს მივიდეს, და გამოიყენოს კლუბის ტერიტორია სხვადასხვა ღონისძიების ჩასატარებლად, პრეზენტაციის მოსაწყობად, ლექციის ჩასატარებლად, თუ უბრალოდ საღამოს სამუშაოდ. (ჩვენთანაც კარგი იქნებოდა ასეთი კლუბის გაკეთება!!!)

"ჰაკერების ტაძარი" ინგლისურად Hacker Dojo (Dojo იაპონურად ტაძარს ნიშნავს) დაინტერესდა ჩემს მიერ შეთავაზებული მულტისენსორული ეკრანის პრეზენტაციის იდეით და შემომთავაზა მისი ჩატარება. მუშა ეკრანი ჩემი სან ფრანცისკოში ყოფნისას მოვამზადე. თბილისიდან წავიღე ორგანული მინა და კამერა, დანარჩენი იქ ვიყიდე და დავამზადე - ჩარჩო, ინფრაწითელი განათებები, კალკა - უკანა პროეცირების ეკრანის მაგივრად.
პრეზენტაცია დოჯოს კალენდარში 15 ოქტომბერს დაიგეგმა და ჩემი ნახელავით ჩავედი სან ფრანცისკოდან მაუნთინ ვიუში. პრეზენტაციისთვის აუცილებლად მჭირდებოდა პროექტორი და კომპიუტერი. პროექტორი დოჯოში ჰქონდათ, კომპიუტერი ვერაფრით ვერ ვიშოვე. რომ არა გიორგი, ქართველი, რომელიც იქ ცხოვრობს, პრეზენტაცია ჩამეშლებოდა, ამიტომ მისი ძალიან მადლობელი ვარ. საერთოდ ბევრი ხალხის მადლობელი ვარ, დავითასი, რომელმაც გიორგები გამაცნო, გიორგისი, რომელსაც ვკითხე ვინმეს ხომ არ აქვს მეთქი კომპიუტერი და მეორე გიორგის კითხა და მას აღმოაჩნდა შესაფერისი და მათხოვა.
მოკლედ შესაბამისი მომზადების შემდეგ, პრეზენტაციამ წარმატებით ჩაიარა. ჩემმა პატარა კედელმა მშვენივრად იმუშავა. რამოდენიმე სურათიც გადავიღე.

ჩემი მაგიდა რუსთავი 2-ზე

ჯანომ რომ ნახა მაგიდა, ძალიან მოეწონა და კარგა ხანი "დამდევდა" უნდა გავაკეთო სიუჟეტიო, ჰოდა აი, როგორც იქნა მეც მოვიცალე და მაგიდაც მეტ-ნაკლებად გამზადებულია სარეპორტაჟოდ "საბავშვო ამბებში"

ცოტა ვიდეოები და სურათები

საცდელი ჩართვა

საცდელი ჩართვა იყო "უმტკივნეულო". მართალია, ყველა ინფრაწითელი გამნათებლები არ იყო "ამოქმედებული" და ეკრანის კიდეებში შეხების ამოცნობა ჭირდა, მაგრამ ზოგადად შედეგი დამაკმაყოფილებელი იყო. ჩემს მიერ შექმნილმა ინფრაწითელმა გამნათებლებმა გაამართლა.

უხილავი მზე

როგორც იქნა მოვახერხე ჩემს "კარადა-მაცივარში" საცდელად ინგრედიენტების შელაგება და საცდელად ჩართვა. ეს იყო დაახლოებით 3 კვირის წინ. სამწუხაროდ საცდელი ჩართვის სურათები და ვიდეო არ მაქვს, შემდეგ ჩართვაზე გადავიღებ.
ცდისას გამოჩნდა, რომ საჭიროა კარგი, თანაბარი ინფრაწითელი განათების უზრუნველყოფა ეკრანის ქვემოდან, რასაც ვერ ახერხებდა იბეიზე ნაყიდი 48 დიოდიანი ინფრაწითელი გამნათებლები (4 ცალი შევუდგი). ამიტომ რამოდენიმე დღის წინ დავიწყე წაგრძელებული ფორმის გამნათებლების აწყობა:

29სმX3სმ ზომის ბეჭდური პლატები მოვჭერი, გავასუფთავე და გავამზადე სურათის დასატანად:


დავიტანე ზედ გამტარების ნახატი, ფრჩხილების ლაქით :)


გავამზადე შიშვლად დარჩენლი სპილენძის მოსაცილებელი ხსნარი (წყალბადის ზეჟანგი+მარილმჟავა+წყალი) და ჩავაგდე მოსაწამლად:


მოწამლული ასეთი გამოვიდა:


ფრჩხილების ლაქი სცილდება აცეტონით:


და ბოლოს მივარჩილე ჩემი პაწაწუნა ინფრაწითელი დიოდები:


და შევაერთე კვების წყაროს.

ანათებს მზესავით...ოღონდ უხილავი მზესავით:



ეს ნათება მხოლოდ ღამის მხედველობის (ინფრაწითელ შუქს რომ აღიქვამს) კამერით ჩანს, შეუიარაღებელი თვალით - არა.

მაგიდა მზადაა!

მაგიდაა, თუ ყუთი, თუ მაცივარი, მოკლედ, დღეს დაამთავრეს ჩემი შეკვეთილი მაგიდის აწყობა, ბოლო აკორდი იყო ჩემი ეკრანის (რომელიც დღეს მივიტანე) ჩასმა ჩარჩოში, რამაც ექსცესების გარეშე ჩაიარა.
ყუთი გამოვიდა საკმაოდ მოზრდილი, დაახლოებით 103სმX136სმ, სიმაღლე 100სმ, არცერთ კარებში არ ეტევა (ლავუაზიეს კანონია რა :D), რომ არა ჩემი ორიგინალური (!) გადაწყვეტა, რომ ყუთი ყოფილიყო ორ-ნაწილიანი, ზედა ნაწილი - ეკრანის ჩარჩო და მის ქვემოთ, სადღაც 30სმ და ქვედა ნაწილი - დანარჩენი ქვედა მხარე - სადღაც 70სმ. ეს ორი ნაწილი ერთმანეთს ადვილად სძვრება და უკან უკეთდება, ხოლო ნაწილ-ნაწილ უკვე ეტევა კარებებში ("მოდი ჯერ ერთი ნაწილი გამოვიტანოთ, მერე მეორე და მერე ისევ თავისივე წებოთი შევაერთოთ" © კ/ფ "ქვევრი").

ეხლა კი დავიწყებ ამ ყუთის შევსებას შიგთავსიით: პროექტორი - კედელზე; ინფრაწითელი "პროჟექტორები" - გასაკეთებელი მაქვს ჯერ; კამერა; კომპიუტერის შიგთავსი - ანუ ყუთის გარეშე; დინამიკები; მართვის პულტი - საერთო კვების კონექტორით და ჩამრთველით, კომპიუტერის ჩამრთველი ღილაკით, რამოდენიმე USB შესაერთებლით; ამ ყველაფრის სადენების გაყვანა-გამოყვანა-დამაგრება.

პროექტორს არანაირი ღილაკები არააქვს, სრულიად პულტით იმართება. მართალია პროექტორი დამალულია ეკრანის ქვეშ, მაგრამ ჩემი ჯადოსნული ეკრანი ატარებს პულტის ინფრაწითელ სხივებს და პროექტორიც "ხედავს" თავის "მბრძანებელს".

და ცოტა სურათები (დააწკაპე გასადიდებლად):

სახელოსნო, სადაც აწყობდნენ ჩემ მაგიდა-ყუთს (მაგრები არიან ბიჭები, თუ დაგჭირდათ ალუმინის ხელოსანი, რეკომენდაციას ვუწევ)


ხელოსანი კახა და ჩემი მაგიდის ქვედა ნაწილი


ეს თვით ზაზა - დიზაინერ-კონსტრუქტორ-კონსულტანტ-მენეჯერი :)


ეკრანის ნაწილი და ჩარჩოს კუთხე - მოახლოებული


ჩემს მანქანაში მთლიანად არ ჩაეტია, მომიწია ტაქსის დაქირავება


და ბოლოს, აწყობილი მაგიდა-ყუთი უკვე სახლში

მაგიდა იქნება 5 დღეში

დღეს ვიყავი ისევ ელიავას ბაზრობაზე. ისევ უაზროდ დავბორიალობდი და ვათვალიერებდი პროფილებს, კუთხეებს, კანტებს და ასე შემდეგ... შემხვდა ჩემი ძველი თანამშრომელი, რომელიც აღმოჩდა, რომ მუშაობს ფინანსისტად, ელიავაზე, ერთერთ მაRაზიაში. ავუხსენი, რო ასე, ტვინს ვიჭყლეტავ ამ მაგიდის დიზაინზე. მან მიმიყვანა ხელოსანთან, ზაზასთან, რომელსაც ავუხსენი რა მინდა იდეაში. ზაზა გამყვა მაღაზიაში, ავარჩიეთ საჭირო აქსესუარები და ნაწილები, მერე დავთვალეთ მასალები და მივეცი შეკვეთა. ასე მითხრა, ოთხშაბათს-ხუთშაბათისთვის დავამთავრებო. ძალიან მიხარია, რომ საქმემ კიდევ წინ წაიწია.

მაგიდის დიზაინი

მოკლედ ვიყავი იმ დღეს ელიავაზე. შევიდოდი რამე მაღაზიაში და ერთი საათი ვათვალიერებდი, გამყიდველები ცერად მიყურებდნენ და ალბათ ფიქრობდნენ ვინააო ესო, რა უნდაო, არაფერს არ ყიდულობსო (ელიავაზე ავეჯის აქსესუარების მაღაზიებში ვინც შედის, ყველამ იცის რას ყიდულობს, იმიტომ რომ ძირითადად ავეჯის ხელოსნები არიან ხოლმე). ვეძებდი ავეჯის იმ ნაწილებს, რომლითაც მოხერხებულად და მოხდენილად გამოვიდოდა მაგიდის კედლების (რომელიც ლამინატის იქნება) და ეკრანის მასალის შერწყმა. რაღაცეები დავიმახსოვრე (ძირითადად ალუმინის კუთხეები) როგორი პროფილების არსებობს, რომ მერე თავში მომეფიქრებინა რომლით უფრო კარგად გამოვიდოდა.
ჰო, ელიავაზე დიდი სარკეც მოვაჭრევინე, რომ გამესინჯა ჩემს პროექტორზე, თუ რამე გამოვიდოდა სარკით, მაგრამ ამაოდ: ფართოკუთხიან პროექტორზე, რომელსაც ეკრანზე დაცემის ძალიან დახრილი კუთხე აქვს, სარკით გამოსახულების "მოტეხვა" საკმაოდ რთულია (ტრაპეციას იღებ, რომელსაც ვერ გაასწორებ) და გადავწყვიტე სარკე საერთოდ არ გამოვიყენო და პროექტორი "პირდაპირი ხედვით" დავაყენო. ეს მაგიდას სიმაღლეს უმატებს და ეკრანის ერთ მხარეს ითხოვს დაახლ 20 სანტიმეტრის თავისუფალ ადგილს (გამოსახულება პროექტორიდან ამდენივეთი იწევს ზემოთ, კედელზე რო ანათებ), მაგრამ არაუშავს. გუშინ საღამოს "გუგლ-სკეჩაუფ"-ში მოვჯღაბნე დაახლოებითი დიზაინი. ამ თავისუფალი ადგილის სასარგებლოდ გამოყენებაც შეიძლება, მაგალითად დინამიკებს ჩავსვავ და რამე რო იყოს, კლავიატურაც დაიდება (ან ყავის ჭიქები და ნამცხვარი :)). კომმენტს - ველქამ!

პროექტორი და სარკე

გუშინ ჩამომივიდა პროექტორი და სარკე. პროექტორს აქვს უზარმაზარი ლინზა და საჭირო ზომის გამოსახულებას იძლევა დაახლოებით 60 სანტიმეტრიდან. სარკე, რომელიც მჭირდება, რომ ჰორიზონტალურად მიმართული პროექცია მივმართო ვერტიკალურად, ზემოთ, ძალიან პატარა აღმოჩნდა - ისე მალევე იშლება პროექცია, რომ წინ დადებული სარკის ზომებს სცდება. მომიწევს თავიდან შეკვეთა, დიდი ზომისა. ეხლა მივდივარ ელიავაზე, მაგიდის "ავეჯური" ნაწილისთვის შესაძლებლობების სანახავად.

ახალი მაგიდის ნაწილები

ცოტა ხნის წინ გადავწყვიტე თხევადკრისტალურის აწყობა გადავდო (გარკვეული ხნით) და ავაწყო დიდი ზომის DI (ან ლაზერებით) მაგიდა. შევუკვეთე შესაბამისი ნაწილები: ეკრანის მასალა (მაიკროსოფტი რო იყენებს, ერთერთ წინა პოსტში დავწერე ამის შესახებ), პროექტორი, რომელიც ძალიან პატარა მანძილიდან იძლევა დიდი ზომის გამოსახულებას და კამერა. კამერა უკვე ჩამომივიდა და გუშინ ჩამომივიდა ეკრანის მასალა, რომელსაც ძალიან ველოდებოდი. ეკრანის ზომა იქნება 120სმ X 75სმ.