Saturday, May 5, 2012

დავბრუნდი

ისევ მინდა გავაგრძელო ჩემი პირადი პროექტებისა და მოსაზრებების შესახებ აქ წერა. იმდენი ახალი რამ დამიგროვდა თავში, მინდა სხვამაც გაიგოს :)

Monday, February 7, 2011

გაგრძელება

ვინაიდან ჩემი საყვარელი საქმის კეთება (ჩხირკედელაობა სხვადასხვა საინტერესო პროექტებზე) თავისუფალი უნივერსიტეტის მათემატიკისა და კომპიუტერული მეცნიერებების სკოლის ლაბორატორიაში გავაგრძელე და ამასთან სტუდენტებსაც გავუზიარებ და გადავცემ ჩემს გამოცდილებას, ჩემს ბლოგზე უფრო იშვიათად დავწერ.
დაგეგმილი მაქვს ლაბის ბლოგი გავხსნა, სადაც ყველა იმ პროექტს გავაშუქებთ, რაზეც ვმუშაობთ.

Saturday, May 29, 2010

მულტისენსორული ყავის მაგიდა (პირველი ვარიანტი)

როგორც იქნა მოვკიდე ხელი ბლოგს..

ყავის მაგიდა, რომელიც წინა პოსტში ვახსენე (და ეს იყო თებერვალში, ეხლა მაისია) ავაწყე მარტში. მარტში ილიას სახელმწიფო უნივერსიტეტის საინჟინრო კოლეჯის გამოფენაზეც მქონდა გატანილი.

ესე იგი: ავაწყე ყუთი , ცოტა უცნაური კონსტრუქციის - ორმაგი გვერდები, გარე გვერდზე მაგიდის თავი დამაგრდება



ყუთის შუა ნაწილი დაიხურა და მის ძირზე განთავსდება კამერა და განათება


ზემოდან დამაგრდება მაგიდის თავი

დანარჩენს სურათებიც იტყვის:











საბოლოოდ გამოვიდა ასეთი რამ:






მაგრამ......

Wednesday, February 17, 2010

მულტისენსორული ყავის მაგიდა

სანამ არ მძინავს, და ალბათ აღარც დავიძინებ დღეს უკვე (6.50AM), დროს ვიხელთებ და პატარა პოსტს მივამატებ ბლოგს:

ეხლა უკვე, როდესაც ჩემს აწყობილ დიდ მულტისენსორულ მაგიდას ახალი მფლობელი ჰყავს, დავიწყე შემდეგი მაგიდის კეთება. ეს იქნება დაბალი, შავი ფერის, 22"-იანი დიაგონალის სენსორული ეკრანის მქონე მაგიდა.
ის შესრულებული იქნება თხევადკრისტალური ეკრანის გამოყენებით და რამოდენიმე ახალი ტექნოლოგიით და კონსტრუქციული გადაწყვეტით. ჯერჯერობით მაქვს მხოლოდ საცდელი ყუთი, რომლითაც წინასწარ ცდებს ვატარებ.
საბოლოო ჯამში, ჩემი აზრით, გამოვა გარეგნულად საკმაოდ მიმხიდველი, კოხტა, პრიალა ნივთი. მეგობარი შემპირდა დახმარებას, სამგანზომილებიანი მოდელის შექმნაში. როცა კი მოვახერხებთ, კონცეპტუალურ სურათებს დავდებ.

Saturday, January 16, 2010

GITI - Georgian IT Innovations Event

ოქტომბრის ბოლოს სასტუმრო "შერატონში" ჩატარდა აითი ინოვაციების კონფერენცია. ეს კონფერენცია უკვე მესამედ (მემგონი) ტარდება და მასში მონაწილეობას იღებენ საქართველოსა და სხვა ქვეყნების სახელმწიფო უწყებები და ასევე დიდი აითი კომპანიები, რომლებიც წარადგენენ თავიანთ მიღწევებს აითი ინოვაციების, ინტეგრაციის და გამოყენების მიმართულებით. კონფერენციას ატარებს ისტ (ინფორმაციულ-საკომუნიკაციო ტექნოლოგიების) ბიზნეს საბჭო და საქართველოს ელ-მთავრობის სახელმწიფო კომისია, ამერიკის საერთაშორისო განვითარების სააგენტოს ბიზნეს კლიმატის რეფორმის პროექტის მხარდაჭერით და ისეთი კომპანიების სპონსორობით, როგორებიცაა მაგთი, HP, მაიქროსოფთი და სხვა.
კონფერენციასთან ერთად, მონაწილეები და სპონსორები აწყობენ გამოფენას, სადაც აჩვენებენ თავიანთ იტ ინოვაციებს და ინტეგრაციას.
კონფერენციის ერთერთი ორგანიზატორი - გიგა არის ჩემი მეგობარი და კოლეგა, რომელმაც შემომთავაზა, რომ ჩემი მულტისენსორული მაგიდა "გამომეფინა" ამ გამოფენაზე.
მე რა თქმა უნდა ძალიან გამიხარდა და კონფერენციის პირველი დღის დილას ჩემი მაგიდა წავიღე გამოფენაზე (ამაში დიდი მადლობა დათოს, ფინანსთა სამინისტროდან, რომელმაც მანქანა გამომიგზავნა).
ჩემმა მოწყობილობამ, ჯერ კიდევ ახალმა მიტანილმა, დაშლილ (გადასატან) მდგომარეობაში მყოფმა მიიქცია იქ მყოფი სტუმრების ყურადღება ისე, რომ ფოტოებს უღებდნენ ჯერ კიდევ უცნობ ყუთს. დაახლოებით ერთი საათი დამჭირდა, რომ ტრანსპორტირების მდგომარეობიდან მუშა მდგომარეობაში მომეყვანა. მაშინ ჯერ კიდევ ბოლომდე არ იყო დამთავრებული მაგიდა, მაგრამ საჩვენებლად მზად იყო.
იმის შემდეგ, რაც ის ჩაირთო, მთელი ორი დღის განმავლობაში, რაც ეს ღონისძიება მიმდინარეობდა, ჩემს მაგიდას ყურადღება არ მოკლებია, უფრო მეტიც, შემიძლია თამამად ვთქვა, რომ სხვა სტენდებს მნახველების ნაკლებობა ჰქონდათ ჩემი მაგიდის გამო, ის ბიზნეს კურიერშიც მოხვდა, პირდაპირ ჩართვაში (აგერ ვიდეო).
ცოტა ფოტოები:

Wednesday, December 30, 2009

დახვეწა

ჩემი მაგიდის მუშაობის გასაუმჯობესებლად რამოდენიმე დამატებითი ცვლილება შევიტანე:
1. მაგიდის ზედა მხარეს დავსვი დინამიკები;
2. კამერა ცოტათი დაბლა დავწიე, უკეთესად რომ დაინახოს (უფრო ნაკლები კუთხით) თითების ანარეკლი კიდეებიდან;
3. დავამატე ვენტილაცია
4. დამატებითი ინფრაწითელი მანათობლები დავამზადე და დავამაგრე
5. დავამატე დამოუკიდებელი კვების ბლოკები - ცალკე ვენტილატორებისათვის და ცალკე მანათობლებისთვის
6. კომპიუტერი დავშალე და ნაწილ-ნაწილ ”ავაკარი” შიგნიდან
7. პულტი დავუკეთ გარედან, სადაც ერთდება დენის წყარო და აქვს ჩასართავი ღილაკი, ასევე ინდიკატორები
ეხლა გაცილებით უკეთესად მუშაობს!
აი ცოტა სურათებიც:

Sunday, October 25, 2009

მულტისენსორული ტექნოლოგიების პრეზენტაცია Mountain View-ში, კალიფორნია

მაუნთინ ვიუ (Mountain View) არის ერთ-ერთი პატარა, მყუდრო, მწვანე ქალაქთაგანი სილიკონის ველზე, სადაც იბადება და ხორციელდება ინფორმაციული ტექნოლოგიების გენიალური წამოწყებები. ამ ქალაქში "ბინადრობენ" Google, LinkedIn, VeriSign, Mozilla, აქვე მეზობელ ქალაქში - "ფეისბუქი" და სხვა ცნობილი კომპანიები.

მაუნთინ ვიუში რამოდენიმე ენთუზიასტმა პროგრამისტმა ჩამოაყალიბა კლუბი ინფორმაციული ტექნოლოგიების პროფესიონალთათვის, სადაც ნებისმიერ მსურველს შეუძლია ნებისმიერ დროს მივიდეს, და გამოიყენოს კლუბის ტერიტორია სხვადასხვა ღონისძიების ჩასატარებლად, პრეზენტაციის მოსაწყობად, ლექციის ჩასატარებლად, თუ უბრალოდ საღამოს სამუშაოდ. (ჩვენთანაც კარგი იქნებოდა ასეთი კლუბის გაკეთება!!!)

"ჰაკერების ტაძარი" ინგლისურად Hacker Dojo (Dojo იაპონურად ტაძარს ნიშნავს) დაინტერესდა ჩემს მიერ შეთავაზებული მულტისენსორული ეკრანის პრეზენტაციის იდეით და შემომთავაზა მისი ჩატარება. მუშა ეკრანი ჩემი სან ფრანცისკოში ყოფნისას მოვამზადე. თბილისიდან წავიღე ორგანული მინა და კამერა, დანარჩენი იქ ვიყიდე და დავამზადე - ჩარჩო, ინფრაწითელი განათებები, კალკა - უკანა პროეცირების ეკრანის მაგივრად.
პრეზენტაცია დოჯოს კალენდარში 15 ოქტომბერს დაიგეგმა და ჩემი ნახელავით ჩავედი სან ფრანცისკოდან მაუნთინ ვიუში. პრეზენტაციისთვის აუცილებლად მჭირდებოდა პროექტორი და კომპიუტერი. პროექტორი დოჯოში ჰქონდათ, კომპიუტერი ვერაფრით ვერ ვიშოვე. რომ არა გიორგი, ქართველი, რომელიც იქ ცხოვრობს, პრეზენტაცია ჩამეშლებოდა, ამიტომ მისი ძალიან მადლობელი ვარ. საერთოდ ბევრი ხალხის მადლობელი ვარ, დავითასი, რომელმაც გიორგები გამაცნო, გიორგისი, რომელსაც ვკითხე ვინმეს ხომ არ აქვს მეთქი კომპიუტერი და მეორე გიორგის კითხა და მას აღმოაჩნდა შესაფერისი და მათხოვა.
მოკლედ შესაბამისი მომზადების შემდეგ, პრეზენტაციამ წარმატებით ჩაიარა. ჩემმა პატარა კედელმა მშვენივრად იმუშავა. რამოდენიმე სურათიც გადავიღე.






ჩემი მაგიდა რუსთავი 2-ზე

ჯანომ რომ ნახა მაგიდა, ძალიან მოეწონა და კარგა ხანი "დამდევდა" უნდა გავაკეთო სიუჟეტიო, ჰოდა აი, როგორც იქნა მეც მოვიცალე და მაგიდაც მეტ-ნაკლებად გამზადებულია სარეპორტაჟოდ "საბავშვო ამბებში"

ცოტა ვიდეოები და სურათები







Monday, August 3, 2009

საცდელი ჩართვა

საცდელი ჩართვა იყო "უმტკივნეულო". მართალია, ყველა ინფრაწითელი გამნათებლები არ იყო "ამოქმედებული" და ეკრანის კიდეებში შეხების ამოცნობა ჭირდა, მაგრამ ზოგადად შედეგი დამაკმაყოფილებელი იყო. ჩემს მიერ შექმნილმა ინფრაწითელმა გამნათებლებმა გაამართლა.